പ്രമോട്ടർമാർക്കുള്ള പരിശീലനവും പട്ടികവർഗ്ഗ വിദ്യാർത്ഥികൾക്കുള്ള ലാപ്ടോപ് വിതരണവും  ജില്ലാ കളക്ടർ  ഉദ്ഘാടനം ചെയ്തു

കാസർകോട് പട്ടികവർഗ്ഗ വികസന ഓഫീസിന്റെ സേവന പരിധിയിൽ പ്രവർത്തിക്കുന്ന എസ്.ടി പ്രമോട്ടർമാർക്ക് നടത്തിയ ഏകദിന പരിശീലനവും പട്ടികവർഗ്ഗ വിദ്യാർത്ഥികൾക്കുള്ള ലാപ്ടോപ്പ് വിതരണവും ജില്ലാ കളക്ടർ കെ.ഇമ്പശേഖർ ഉദ്ഘാടനം ചെയ്തു. പട്ടിക വർഗ്ഗ മേഖലയിലെ ഉന്നതികളിൽ സർക്കാർ പദ്ധതികള് എത്തിക്കുന്നതിനും ഉന്നതികളിലെ ജനങ്ങളുടെ വികസനത്തിനും വലിയ പങ്കാണ് പ്രമൊട്ടർമാർക്ക് ഉള്ളതെന്നും അത് കൃത്യമായി നിർവ്വഹിക്കാൻ മുന്നിൽ നിൽക്കണമെന്നും കളക്ടർ പറഞ്ഞു.

ജില്ലാ പ്ലാനിംഗ് ഓഫീസർ ടി.രാജേഷ്, തദ്ദേശസ്വയംഭരണ വകുപ്പ് ഡെപ്യൂട്ടി ഡയറക്ടർ കെ.വി.ഹരിദാസ്, നവകേരളം കർമ്മ പദ്ധതി ജില്ലാ കോ-ഓർഡിനേറ്റർ  കെ.ബാലകൃഷ്ണൻ, റിസർച്ച് അസിസ്റ്റന്റ്   വി.കുഞ്ഞികൃഷ്ണൻ എന്നിവർ  ക്ലാസ്സെടുത്തു. മാലിന്യ മുക്ത നവ കേരളം ജനകീയ കാമ്പയിൻ സംബന്ധിച്ചും പട്ടിക വർഗ്ഗ മേഖലയിലെ വിവിധ സർക്കാർ പദ്ധതി കളെക്കുറിച്ചും ക്ലാസ് നൽകി. ഉദ്ഘാടന ചടങ്ങിൽ പട്ടികവർഗ്ഗ വികസന ഓഫീസർ കെ.കെ.മോഹൻദാസ്, അസിസ്റ്റന്റ് ട്രൈബൽ ഡവലപ്മെന്റ് ഓഫീസർ  കെ.വി.രാഘവൻ, ട്രൈബൽ എക്സ്റ്റൻഷൻ ഓഫീസർമാരായ  വീണ നാരായണ.കെ,  കെ. വീരേന്ദ്രകുമാർ എന്നിവർ സംസാരിച്ചു.