വായനാ പക്ഷാചരണം; ജില്ലയില്‍  വിവിധ പരിപാടികള്‍ സംഘടിപ്പിക്കും     

വായനാപക്ഷാചരണം ജില്ലയില്‍ വിപുലമായി ആഘോഷിക്കുന്നതിന് സംഘാടക സമിതിയായി. പിഎന്‍ പണിക്കരുടെ ചരമദിനമായ ജൂണ്‍ 19ന് തുടങ്ങി ഐവി ദാസിന്റെ ജന്‍മദിനമായ ജൂലൈ എഴ് വരെയാണ് വിവിധങ്ങളായ പരിപാടികള്‍ സംഘടിപ്പിക്കുന്നത്.  19ന് ജില്ലാതല ഉദ്ഘാടനവും പിഎന്‍ പണിക്കര്‍ അനുസ്മരണവും ജൂലൈ ഏഴിന് താലൂക്ക് കേന്ദ്രങ്ങളില്‍ സമാപന സമ്മേളനവും ഐവി ദാസ് അനുസ്മരണവും നടക്കും. സബ്ജില്ലാ അടിസ്ഥാനത്തില്‍ കുട്ടികള്‍ക്ക് വായനാകുറിപ്പ് തയ്യാറാക്കല്‍ മല്‍സരം നടത്തും. 
    ലൈബ്രറി കൗണ്‍സില്‍ സംഘടിപ്പിക്കുന്ന എല്‍പി, യുപി, വനിതാ വായനാമല്‍സരത്തിന്റെ പ്രാഥമിക തലം ജൂലൈ 7 ന് ആരംഭിക്കും.  സ്‌കൂളുകളില്‍ എഴത്തു പെട്ടി, സ്‌കൂള്‍ ലൈബ്രറി  സജ്ജീകരിക്കല്‍, ലൈബ്രറികളില്‍ പുസ്തക പ്രദര്‍ശനം, അമ്മ വായന, ലഹരി വിരുദ്ധ സദസ്സ്, ലൈബ്രറികളിലേക്ക് പുസ്തകം സമാഹരിക്കുന്ന അക്ഷരഭിക്ഷ, ഹൈസ്‌കൂള്‍ വിദ്യാര്‍ത്ഥികളുടെ വായനാമല്‍സരം, പൊന്‍കുന്നം വര്‍ക്കി അനുസ്മരണം, വൈക്കം മുഹമ്മദ് ബഷീര്‍ അനുസ്മരണം, എഴുത്ത് പെട്ടിയിലെ നല്ല വായനാ കുറിപ്പിന് സമ്മാനം നല്‍കല്‍, വനിതാ വേദിയുടെ നേതൃത്വത്തില്‍ വായനശാലകളില്‍ വായനാകൂട്ടം തുടങ്ങിയ പരിപാടികളും സംഘടിപ്പിക്കും. 
   വിദ്യാഭ്യാസ വകുപ്പ്, ലൈബ്രറി കൗണ്‍സില്‍, ഇന്‍ഫര്‍മേഷന്‍ പബ്ലിക്ക് റിലേഷന്‍സ് വകുപ്പ്, പിഎന്‍ പണിക്കര്‍ ഫൗണ്ടേഷന്‍, സാക്ഷരതാ മിഷന്‍, കുടുംബശ്രി, വിദ്യാരംഗം കലാസാഹിത്യ വേദി, ആര്‍എംഎസ്എ, എസ്എസ്എ തുടങ്ങിയ സംഘടനകളുടെ സഹകരണത്തോടെയാണ് വായനാ പക്ഷാചരണം സംഘടിപ്പിക്കുക. 
    കലക്ടറുടെ ചേമ്പറില്‍ ചേര്‍ന്ന യോഗത്തില്‍ ജില്ലാ പഞ്ചായത്ത് പ്രസിഡന്റ് കെ വി സുമേഷ് അധ്യക്ഷനായി. ജില്ലാ കലക്ടര്‍ മീര്‍മുഹമ്മദലി, ലൈബ്രറി കൗണ്‍സില്‍ ജില്ലാ സെക്രട്ടറി പി കെ ബൈജു, വിദ്യാഭ്യാസ വകുപ്പ് അഡ്മിനിസ്‌ട്രേഷന്‍ ഓഫീസര്‍ സി പി  പത്മരാജന്‍, പിഎന്‍ പണിക്കര്‍ ഫൗണ്ടേഷന്‍ സംസ്ഥാന സെക്രട്ടറി കാരയില്‍ സുകുമാരന്‍, ജില്ലാ ആസൂത്രണ സമിതി അംഗം കെ വി ഗോവിന്ദന്‍, ഡിഇഒ കെ വി ലീല, തളിപറമ്പ് ഡിഇഒ കെ രാധാകൃഷ്ന്‍, വിദ്യാരംഗം കലാസഹിത്യ വേദി ജില്ലാ കോര്‍ഡിനേറ്റര്‍ എം ക വസന്തന്‍ തുടങ്ങിയവര്‍ സംസാരിച്ചു. വിവിധ വകുപ്പ് മേധാവികളും പങ്കെടുത്തു. കലക്ടര്‍ മീര്‍ മുഹമ്മദലി ചെയര്‍മാനും ലൈബ്രറി കൗണ്‍സില്‍ ജില്ലാ സെക്രട്ടറി പി കെ ബൈജു ജനറല്‍ കണ്‍വീനറുമായി സംഘാടക സമിതി രൂപീകരിച്ചു.