അമ്പലപ്പുഴ താലൂക്ക് അദാലത്ത് ഇന്ന്(04); മന്ത്രി പി പ്രസാദ് ഉദ്ഘാടനം ചെയ്യും

പൊതുജനങ്ങളുടെ പരാതികൾ പരിഹരിക്കുന്നതിന് മന്ത്രിമാരുടെ നേതൃത്വത്തില്‍ സംസ്ഥാനസർക്കാർ സംഘടിപ്പിക്കുന്ന അദാലത്തുകളിൽ അമ്പലപ്പുഴ താലൂക്കിലേത് ജനുവരി 4 ശനിയാഴ്ച്ച രാവിലെ 09 ന് ആലപ്പുഴ സെന്റ് ജോസഫ്സ് എച്ച് എസ് എസിൽ നടക്കും. കൃഷിവകുപ്പ് മന്ത്രി പി പ്രസാദ് ഉദ്ഘാടനം നിർവഹിക്കും.  
ഫിഷറീസ്, സാംസ്കാരിക വകുപ്പ് മന്ത്രി സജി ചെറിയാൻ അധ്യക്ഷത വഹിക്കും. 
ഉദ്ഘാടന സമ്മേളനത്തിൽ കെസി വേണുഗോപാൽ എംപി, എം എൽ എ മാരായ പി പി ചിത്തരഞ്ജൻ, എച്ച് സലാം, ജില്ലാ പഞ്ചായത്ത് പ്രസിഡൻറ് കെ ജി രാജേശ്വരി, ജില്ലാ കളക്ടർ അലക്സ് വർഗീസ്,
ആലപ്പുഴ നഗരസഭ ചെയർപേഴ്സൺ  കെകെ. ജയമ്മ, സബ് കളക്ടർ സമീർ കിഷൻ, തദ്ദേശസ്ഥാപന ജനപ്രതിനിധികൾ എന്നിവർ പങ്കെടുക്കും. 
ഉദ്ഘാടന സമ്മേളനത്തിന് ശേഷം മന്ത്രിമാരുടെ നേതൃത്വത്തിൽ അദാലത്ത് ആരംഭിക്കും. അദാലത്ത് ദിവസം ഏത് വകുപ്പുമായി ബന്ധപ്പെട്ട പരാതികളിലും നിയമവും ചട്ടങ്ങളും പരിശോധിച്ച് തീര്‍പ്പുകല്‍പ്പിക്കാനുള്ള പ്രത്യേക അധികാരം മന്ത്രിമാര്‍ക്ക് സര്‍ക്കാര്‍ നല്‍കിയിട്ടുണ്ട്. പുതിയ അപേക്ഷകള്‍ സ്വീകരിക്കാനും അദാലത്ത് വേദിയില്‍ സൗകര്യം ഒരുക്കിയിട്ടുണ്ട്. റിസപ്ഷന്‍, അന്വേഷണ കൗണ്ടറുകള്‍, കടിവെള്ളം, ലഘുഭക്ഷണം, വൈദ്യസേവനം,  എന്നിവക്കുള്ള സൗകര്യങ്ങളും അദാലത്ത് വേദികളില്‍ ഒരുക്കിയിട്ടുണ്ട്. പൂര്‍ണമായും ഹരിതചട്ടം പാലിച്ചുകൊണ്ടാണ് അദാലത്ത് സംഘടിപ്പിക്കുന്നത്. 
 കുട്ടനാട് താലൂക്ക് അദാലത്ത് ജനുവരി 6 ന് തിങ്കളാഴ്ച മങ്കൊമ്പ് ഡോ. എം എസ് സ്വാമിനാഥന്‍ റൈസ് റിസര്‍ച്ച് സ്റ്റേഷനിലും കാര്‍ത്തികപ്പള്ളി  താലൂക്ക് അദാലത്ത് ജനുവരി 7 ന് ചൊവ്വാഴ്ച ചേപ്പാട് താമരശ്ശേരി കണ്‍വെന്‍ഷന്‍ സെന്ററിലും  ചെങ്ങന്നൂര്‍ താലൂക്ക് അദാലത്ത് ജനുവരി 13 ന് ചെങ്ങന്നൂര്‍ ഐഎച്ച്ആര്‍ഡി എന്‍ജിനീയറിങ് കോളേജ് ഓഡിറ്റേറിയത്തിലും മാവേലിക്കര താലൂക്ക് അദാലത്ത് ജനുവരി 14 ന് മാവേലിക്കര ബിഷപ്പ് ഹോഡ്ജസ് സ്‌കൂളിലും നടക്കും. 
 (പി.ആര്‍/എ.എല്‍.പി/27)