ഉല്ലാസ് പദ്ധതി; ജില്ലാതല റിസോഴ്‌സ് പേഴ്‌സൺമാർക്ക് പരിശീലനം നൽകി.

നിരക്ഷരത നിർമാർജ്ജന പദ്ധതിയായ ഉല്ലാസിന്റെ ഭാഗമായി തെരഞ്ഞെടുക്കപ്പെട്ട ജില്ലാതല റിസോഴ്‌സ് പേഴ്‌സൺമാർക്ക് പരിശീലനം നൽകി. അവശേഷിക്കുന്ന നിരക്ഷരരെ കണ്ടെത്തി സാക്ഷരരാക്കുന്ന കേന്ദ്ര സർക്കാർ പദ്ധതിയ്ക്കായി കോട്ടയം ജില്ലയിലെ 20 ഗ്രാമപഞ്ചായത്തുകളെയാണ് തെരഞ്ഞെടുത്തിരുന്നത്. ഒരു പഞ്ചായത്തിൽ നിന്നു മൂന്നുപേർ വീതമുള്ള 60 അംഗ ജില്ലാ റിസോഴ്‌സ് ഗ്രൂപ്പാണ് രൂപീകരിച്ചിട്ടുള്ളത്. പദ്ധതിയുടെ രൂപരേഖ, സർവേ നടത്തിപ്പ്, പഠന ക്ലാസുകൾ നിശ്ചയിക്കൽ, ക്ലാസ് ആരംഭം തുടങ്ങിയ സെഷനുകളാണ് പരിശീലനത്തിൽ ഉൾപ്പെടുത്തിയിരുന്നത്.

ഓൺലൈനായി നടത്തിയ പരിശീലന പരിപാടി സംസ്ഥാന സാക്ഷരതാ മിഷൻ കോർഡിനേറ്റർ ഡോ. വി വി മാത്യു ഉദ്ഘാടനം ചെയ്തു. നിർമല റെയ്ച്ചൽ ജോയ് ക്ലാസുകൾക്ക് നേതൃത്വം നൽകി. ജില്ലാ സാക്ഷരതാമിഷൻ കോർഡിനേറ്റർ കെ വി രതീഷ് അധ്യക്ഷനായി. താര തോമസ്, ടി എൻ രാധാകൃഷ്ണൻ എന്നിവർ പ്രസംഗിച്ചു. പദ്ധതി നടപ്പാക്കുന്ന പഞ്ചായത്തുകളിൽ സംഘാടക സമിതികൾ രൂപീകരിച്ചു. വാർഡ് തലത്തിലെ സംഘാടക സമിതികൾ രൂപീകരിച്ച് വരുന്നു. സർവേ വോളന്റിയർമാർക്കുള്ള പരിശീലനം ഗ്രാമപഞ്ചായത്ത് തലത്തിൽ നടക്കും. ജില്ലാ റിസോഴ്‌സ് പേഴ്‌സൺമാർ പരിശീലനത്തിന് നേതൃത്വം നൽകും. മാർച്ച് 16 ഞായറാഴ്ച സർവേ നടത്താനാണ് തീരുമാനം.