ജില്ലയില്‍ നാളെ മുതല്‍ 118 ഫ്രീ വൈഫൈ കേന്ദ്രങ്ങള്‍
എല്ലാ ജനങ്ങള്‍ക്കും ഇന്റര്‍നെറ്റ് സൗകര്യം ലഭ്യമാക്കുകയെന്ന സംസ്ഥാന സര്‍ക്കാരിന്റെ ലക്ഷ്യം യാഥാര്‍ത്ഥ്യമാകുന്നു. ജില്ലയിലെ 118 ഇടങ്ങള്‍ നാളെ (മെയ് 14) മുതല്‍ ഫ്രീ വൈഫൈ കേന്ദ്രങ്ങളാകും. താലൂക്ക് ഓഫീസുകള്‍, ഗ്രാമ-ബ്ലോക്ക് പഞ്ചായത്തുകള്‍, കെ.എസ്.ആര്‍.ടി.സി ബസ്സ്റ്റാന്‍ഡുകള്‍, സ്‌കൂളുകള്‍, കോളേജുകള്‍, സര്‍വ്വകലാശാലകള്‍ തുടങ്ങിയ ഇടങ്ങളിലാണ് സൗജന്യ ഇന്റര്‍നെറ്റ് സേവനം ലഭിക്കുക. മന്ത്രിസഭാ വാര്‍ഷികത്തോടനുബന്ധിച്ച് നാഗമ്പടം മൈതാനിയില്‍ നടക്കുന്ന ഉല്‍പ്പന്ന പ്രദര്‍ശന-വിപണനമേളയുടെ ഉദ്ഘാടന ചടങ്ങില്‍ വനം-ക്ഷീര- മൃഗസംരക്ഷണ വകുപ്പു മന്ത്രി അഡ്വ.കെ.രാജു ഈ സ്ഥലങ്ങളെ ഫ്രീ വൈഫൈ കേന്ദ്രങ്ങളായി പ്രഖ്യാപിക്കും. ജില്ലാ ഭരണകൂടമാണ് ഈ കേന്ദ്രങ്ങള്‍ തെരഞ്ഞെടുത്തിട്ടുള്ളത്. ബി.എസ്.എന്‍.എല്ലും ഐ.ടിമിഷനും ചേര്‍ന്നാണ് വൈഫൈ സൗകര്യത്തിനുള്ള ക്രമീകരണങ്ങള്‍ ഏര്‍പ്പെടുത്തിയിരിക്കുന്നത്. വൈഫൈ റൂട്ടറുകള്‍ ഉള്‍പ്പെടെയുള്ള സാങ്കേതിക സൗകര്യങ്ങള്‍ ഐ.ടി.മിഷന്റെ നേതൃത്വത്തിലാണ് സ്ഥാപിച്ചിട്ടുള്ളത്. ബി.എസ്.എന്‍.എല്‍ ആണ് സേവനദാതാവ്. സര്‍ക്കാര്‍ സൈറ്റുകള്‍ പരിധിയില്ലാതെയും സ്വകാര്യ സൈറ്റുകളില്‍ 300 മെഗാ ബൈറ്റു വരെയും ഈ കേന്ദ്രങ്ങളില്‍ ഫോണിലൂടെയും നെറ്റ് കണക്ടറിന്റെ സഹായത്തോടെ ലാപ്‌ടോപ്പിലും വൈഫൈ ഉപയോഗിക്കാനാകും. മൂന്നു മാസത്തിനകം ആരംഭിക്കുന്ന രണ്ടാം ഘട്ടത്തില്‍ പ്രധാന ടൂറിസ്റ്റ് കേന്ദ്രങ്ങള്‍ ഉല്‍പ്പെടെ 82 ഇടങ്ങള്‍ കൂടി ഫ്രീ വൈഫൈ കേന്ദ്രങ്ങളാക്കുമെന്ന് ഐ.ടി മിഷന്‍ കോ-ഓര്‍ഡിനേറ്റര്‍ സംഗീത് സോമന്‍ അറിയിച്ചു.
(കെ.ഐ.ഒ.പി.ആര്‍-908/18)
- Log in to post comments