ജില്ലാ ആശുപത്രിക്ക് അത്യാധുനിക ആംബുലന്‍സ് കൈമാറി
ജില്ലാ ആശുപത്രിക്ക് പി വി അബ്ദുല്‍ വഹാബ് എം പിയുടെ പ്രദേശിക വികസന ഫണ്ടില്‍ നിന്നും അനുവദിച്ച അത്യാധുനിക ആംബുലന്‍സ് കൈമാറി. ആശുപത്രി പരിസരത്ത് നടന്ന ചടങ്ങില്‍ പി വി അബ്ദുല്‍ വഹാബ് എം. പി ജില്ലാ പഞ്ചായത്ത് പ്രസിഡന്റ് എ.പി. ഉണ്ണികൃഷ്ണന് താക്കോല്‍ നല്‍കി ആംബുലന്‍സ് ആശുപത്രിയുടെ ഭാഗമാക്കി. അത്യാസന്ന നിലയിലുള്ള രോഗികള്‍ക്ക് വേണ്ട എല്ലാവിധ സംവിധാനവും ആംബുലന്‍സില്‍ ഒരിക്കിയിട്ടുണ്ടെന്ന് എം പി പറഞ്ഞു. മൊബൈല്‍ ഐ സി യു ആയി തന്നെ ആംബുലന്‍സ് പ്രവര്‍ത്തിക്കും. ഇത് നിലമ്പൂരിലുള്ള രോഗികളെ വിദഗ്ധ ചികില്‍സയ്ക്ക് സമീപ നഗരങ്ങളിലെ ആശുപത്രികളിലേക്ക് മാറ്റുമ്പോള്‍ വളരെ ഉപകാരപ്രദമാകുമെന്ന് അദ്ദേഹം കൂട്ടിച്ചേര്‍ത്തു.
സംസ്ഥാനത്ത് ആദ്യമായാണ് ഇത്രയും ആധുനിക സംവിധാനങ്ങളുള്ള ആംബുലന്‍സ് ഒരു ജില്ലാ ആശുപത്രിക്ക് ലഭിക്കുന്നത്. നാല് ടെക്നീഷ്യന്‍മാരും, ഒരു ഡോക്ടറും ആംബുലന്‍സില്‍ സേവനത്തിനുണ്ട്. വെന്റിലേറ്റര്‍ സൗകര്യം, ഹൃദ്രോഗികള്‍ക്ക് വേണ്ട മെഡിക്കല്‍ സഹായങ്ങള്‍, അപകടത്തില്‍ പെട്ടവര്‍ക്ക് വേണ്ട അത്യാഹിത സംവിധാനങ്ങള്‍ എന്നിവയെല്ലാം ആംബുലന്‍സില്‍ ഒരുക്കിയിട്ടുണ്ട്. എം പി ഫണ്ടില്‍ നിന്നും 30 ലക്ഷം രൂപ ചെലവിട്ടാണ് ആംബുലന്‍സ് സജ്ജമാക്കിയത്.
2016-17 വര്‍ഷത്തെ ഫണ്ടില്‍ നിന്നാണ് പദ്ധതിക്ക് വേണ്ട തുക അനുവദിച്ചത്. ഇതോടൊപ്പം സാധാരണ ആംബുലന്‍സ് ഒന്നും എം പി ആശുപത്രിക്ക് അനുവദിച്ചിരുന്നു. ഇത് രണ്ട് മാസം മുമ്പ് ആശുപത്രിക്ക് വിട്ട് നല്‍കിയിരുന്നു. എം പി ഫണ്ടില്‍ നിന്നു തന്നെ ആറ് ലക്ഷം രൂപ ചെലവില്‍ ആശുപത്രി കോമ്പൗണ്ടില്‍ നിര്‍മിച്ച ഹൈമാസ്റ്റ് ലൈറ്റിന്റെ ഉല്‍ഘാടനവും എം. പി നിര്‍വ്വഹിച്ചു.
ജില്ലാ പഞ്ചായത്ത് അംഗങ്ങളായ ഇസ്മായില്‍ മൂത്തേടം, ഒ.ടി. ജയിംസ്, ബ്ലോക്ക് സ്ഥിര സമിതി ചെയര്‍മാന്‍ കെ.ടി. കുഞ്ഞാന്‍, നഗരസഭാംഗങ്ങളായ ഗിരീഷ് മോളൂര്‍ മഠത്തില്‍, മുജീബ് ദേവശ്ശേരി, ഡെപ്യൂട്ടി ഡി.എം.ഒ. ഡോ. കെ മുഹമ്മദ് ഇസ്മയില്‍, എന്‍.എച്ച്. എം. ജില്ലാ പ്രൊഗ്രാം മാനേജര്‍ ഡോ. ഷിബുലാല്‍, നിലമ്പൂര്‍ ജില്ലാ ആശുപത്രി സൂപ്രണ്ട് ഡോ. സി. ഹമീദ്, ആശുപത്രി വികസന സമിതി അംഗങ്ങള്‍, എന്നിവര്‍ സംബന്ധിച്ചു.
- Log in to post comments