രുചിവൈവിധ്യങ്ങളുമായി കഫേ കുടുംബശ്രീ ദേശീയ ഭക്ഷ്യമേളക്ക് തുടക്കം
കുടുംബശ്രീ ജില്ലാ മിഷന്റെ ആഭിമുഖ്യത്തില്‍ നബാര്‍ഡിന്റെ സഹകരണത്തോടെ 'കഫേ കുടുംബശ്രീ ഇന്ത്യ ഫുഡ് കോര്‍ട്ട്' ദേശീയ ഭക്ഷ്യമേളക്ക് തുടക്കമായി. ആശ്രാമം മൈതാനിയില്‍ ഒരുക്കിയ മേളയില്‍ കൊല്ലത്തിന്റെ തനത് രുചികള്‍ക്ക് പുറമെ ഇതര ജില്ലകളില്‍നിന്നും തമിഴ്നാട്, ആന്ധ്രപ്രദേശ്, ഒഡിഷ, ഉത്തരാഖണ്ഡ് തുടങ്ങിയ സംസ്ഥാനങ്ങളില്‍നിന്നുമുള്ള സംരംഭകര്‍ 20 സ്റ്റാളുകളിലായാണ് ഭക്ഷ്യവിഭവങ്ങള്‍ ഒരുക്കിയിട്ടുള്ളത്.
രാജസ്ഥാന്‍ സ്റ്റാളില്‍ ആലൂ പനീര്‍ ടിക്ക, പാപ്ടി ചാട്ട്, കച്ചോരി എന്നിവയും തമിഴ്നാട് സ്റ്റാളില്‍ സ്പെഷ്യല്‍ ചിക്കന്‍ കിഴി ബിരിയാണിയും ഉത്തരാഖണ്ഡ് സ്റ്റാളില്‍നിന്ന് പാനി പൂരിയും ഉള്‍പ്പെടെ ഒരുക്കിയിട്ടുണ്ട്. തിരുവനന്തപുരം സ്റ്റാളില്‍ ബണ്‍ പൊറോട്ട, കാന്താരി ചിക്കന്‍, കാസര്‍കോട് സ്പെഷ്യല്‍ ചിക്കന്‍ സുക്ക, നെയ്പത്തല്‍, ചിക്കന്‍ മുറുക്കിയത്, നോമ്പ് കഞ്ഞി, അട്ടപ്പാടിയുടെ തനത് രുചിക്കൂട്ടായ വനസുന്ദരി ചിക്കന്‍ എന്നിവയെല്ലാം സ്റ്റാളുകളില്‍ ഇടംപിടിച്ചിട്ടുണ്ട്. എറണാകുളത്തു നിന്നുള്ള ജ്യൂസുകള്‍ മാത്രം വില്‍ക്കുന്ന സ്റ്റാളില്‍ നെല്ലിക്കയും മറ്റ് പഴങ്ങളും ചേര്‍ത്ത് പോഷക ഗുണത്തില്‍ ഏഴ് തരം ജ്യൂസുകള്‍ രുചിക്കാം. കൊല്ലം സ്റ്റാളുകളില്‍ ബര്‍ഗര്‍, കട്‌ലറ്റ്, പോപ്പ്കോണ്‍ തുടങ്ങിയവും ഫാസ്റ്റ് ഫുഡ് ഐറ്റങ്ങളും പായസം, ഐസ്‌ക്രീം എന്നിവയും ലഭ്യമാണ്. അഞ്ച് രൂപ മുതല്‍ 500 രൂപയുടെ വരെയുള്ള ഫുഡ് കൂപ്പണുകളും ലഭ്യമാണ്.
കൊല്ലം @75 വര്‍ഷികാഘോഷത്തിന്റെ ഭാഗമായി മാര്‍ച്ച് മൂന്ന് മുതല്‍ കുടുംബശ്രീയുടെ തീം സ്റ്റാളുകളും ആരംഭിക്കും. ഭക്ഷ്യമേള മാര്‍ച്ച് ഒമ്പതിന് സമാപിക്കും.
- Log in to post comments