വികസിത് ഭാരത് യൂത്ത്പാര്‍ലമെന്റ്: ജില്ലാതല മത്സരം മാര്‍ച്ച് 15 മുതല്‍
കേന്ദ്ര യുവജന കാര്യകായിക മന്ത്രാലയം സംഘടിപ്പിക്കുന്ന വികസിത് ഭാരത് യൂത്ത്പാര്‍ലമെന്റ് ജില്ലാതല മത്സരം മാര്‍ച്ച് 15 ന് ആരംഭിക്കും. യൂത്ത് പാര്‍ലമെന്റില്‍ രജിസ്റ്റര്‍ ചെയ്യാനുള്ള അവസരം മാര്‍ച്ച് 9 വരെയാണ്.
വികസിത ഭാരത സങ്കല്പങ്ങള്‍ക്ക് യുവാക്കളുടെ ആശയരൂപീകരണം സാധ്യമാക്കുക എന്ന ഉദ്ദേശ്യത്തോടെയാണ് യൂത്ത് പാർലമെൻ്റ് സംഘടിപ്പിക്കുന്നത്.
'വികസിത ഭാരതം എന്നതുകൊണ്ട് എന്താണ് അര്‍ത്ഥമാക്കുന്നത്?' എന്ന വിഷയത്തില്‍ ഒരു മിനിറ്റ് ദൈര്‍ഘ്യമുള്ള പ്രസംഗ വീഡിയോ മൈ ഭാരത് പോര്‍ട്ടലില്‍ അപ്ലോഡ് ചെയ്താണ് രജിസ്റ്റര്‍ ചെയ്യേണ്ടത്. സംസ്ഥാനത്തെ നാല് മേഖലകളിൽ ജില്ലാതല മത്സരങ്ങള്‍ സംഘടിപ്പിക്കും. സംസ്ഥാന മത്സരത്തില്‍ വിജയികളാകുന്ന മൂന്ന്‌പേര്‍ക്കാണ് പാര്‍ലമെന്റ് മന്ദിരത്തില്‍ നടക്കുന്ന ദേശീയതല മത്സരത്തില്‍ പങ്കെടുക്കാനുള്ള അവസരം .
തിരുവനന്തപുരം, കൊല്ലം എന്നീ ജില്ലകളില്‍ ഉള്ള മത്സാരാര്‍ഥികള്‍ക്കുള്ള ജില്ലാതല മത്സരം തിരുവനന്തപുരം കോളേജ് ഓഫ് എഞ്ചിനീയറിംഗില്‍ സംഘടിപ്പിക്കും. ആലപ്പുഴ, പത്തനംതിട്ട, തൃശൂര്‍ എന്നീ ജില്ലകളിലെ മത്സാരാര്‍ഥികള്‍ക്കുള്ള മത്സരം ആലപ്പുഴ സെന്റ് ജോസഫ് കോളേജ് ഫോര്‍ വുമണില്‍ സംഘടിപ്പിക്കും.
കോട്ടയം, ഇടുക്കി, എറണാകുളം, ലക്ഷദ്വീപ് എന്നിവിടങ്ങളില്‍ നിന്നുള്ളവര്‍ക്കു കോട്ടയം അമലഗിരി ബിഷപ്പ് കുര്യാളശേരി കോളേജ് ഫോര്‍ വുമണിലും, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍ഗോഡ്, മാഹി എന്നിവടങ്ങളില്‍ നിന്ന് തിരഞ്ഞെടുക്കുന്ന മത്സാരാര്‍ഥികള്‍ക്കു മീനങ്ങാടി എല്‍ദോ മാര്‍ ബസേലിയസ് കോളേജിലും മത്സരം നടത്തും.
നോഡല്‍ ജില്ലാ തല മത്സരങ്ങളില്‍ വിജയികളാവുന്ന 10 പേര്‍ക്ക് സംസ്ഥാന തല മത്സരങ്ങളില്‍ പങ്കെടുക്കാന്‍ അവസരം ലഭിക്കും.
സംസ്ഥാന തല മത്സരങ്ങളില്‍ ഒന്നും രണ്ടും മൂന്നും സ്ഥാനങ്ങള്‍ നേടുന്നവര്‍ക്ക് പാര്‍ലമെന്റില്‍ സംഘടിപ്പിക്കുന്ന ദേശീയ തല മത്സരത്തില്‍ പങ്കെടുക്കാം.
വികസിത് ഭാരത് യൂത്ത് പാര്‍ലമെന്റില്‍ രജിസ്റ്റര്‍ ചെയ്യാന്‍ ഈ പോര്‍ട്ടലില്‍ ലോഗിന്‍ ചെയ്യുക - https://mybharat.gov.in/mega_events/viksit-bharat-youth-parliament
രജിസ്‌ട്രേഷനും കൂടുതല്‍ വിവരങ്ങള്‍ക്കും അതാത് നാഷണല്‍ സര്‍വീസ് സ്‌കീം പ്രോഗ്രാം ഓഫീസര്‍മാരുമായും നെഹ്‌റു യുവ കേന്ദ്ര ജില്ലാ യൂത്ത് ഓഫീസര്‍മാരുമായും ബന്ധപ്പെടുക. ഫോണ്‍: 7558892580
- Log in to post comments