കയർ വ്യവസായ സെമിനാർ സംഘടിപ്പിച്ചു

കേന്ദ്ര എംസ്എംഇ മന്ത്രാലയത്തിന് കീഴിലുള്ള കയർ ബോർഡ് കലവൂർ റീജിയണൽ ഓഫീസിന്റെ ആഭിമുഖ്യത്തിൽ 'പരമ്പരാഗത കയർ വ്യവസായത്തിന്റെ സുസ്ഥിര വികസനത്തിന്‌ സ്പിന്നിംഗ് മേഖലയുടെ ആധുനികവൽക്കരണം' എന്ന വിഷയത്തിൽ മേഖല സെമിനാർ സംഘടിപ്പിച്ചു. ചുങ്കം പഗോഡ റിസോർട്ടിൽ സംഘടിപ്പിച്ച സെമിനാർ ജില്ലാ കളക്ടർ അലക്സ്‌ വർഗീസ് ഉദ്ഘാടനം ചെയ്തു. കയർ മേഖലയിലെ യന്ത്രവൽക്കരണം ഉൽപപ്പാദനച്ചെലവ് കുറയ്ക്കാൻ സഹായിക്കുമെന്നും പരമ്പരാഗത കയർ തൊഴിലാളികളെ ഇതിനോടൊപ്പം സംരക്ഷിക്കുകയും വേണമെന്നും ജില്ലാ കളക്ടര്‍ പറഞ്ഞു. ജില്ലയിൽ ഗുണമേന്മയുള്ള പച്ചത്തൊണ്ടിന്റെ ലഭ്യത കുറഞ്ഞിട്ടുണ്ട്. ഈ പ്രതിസന്ധി മറികടക്കുന്നതിന് അമ്പലപ്പുഴ ബ്ലോക്ക്‌ പഞ്ചായത്തിൽ ഗുണമേന്മ കൂടിയ ഇനമായ കൊടുവള്ളി തേങ്ങയുടെ 75000ത്തോളം വിത്തുകള്‍ നല്‍കിയതായും കളക്ടർ പറഞ്ഞു.
സെമിനാറിൽ ബയോ ബ്ലീച്ചിങ്, സ്പിന്നിങ് മേഖലയുടെ ആധുനികീകരണം, കയർ പ്ലൈ, കയർ കയറ്റുമതി മേഖലയിലെ മാലിന്യം ഉപയുക്തമാക്കൽ, കയർ ഉത്പന്ന വൈവിധ്യവത്കരണം എന്നീ വിഷയങ്ങളിൽ ചർച്ച നടന്നു. കയർ ഡയറക്ടറേറ്റ് അഡീഷണൽ ഡയറക്ടർ ആൻഡ് ഡയറക്ടർ ഇൻ ചാർജ് ടി ഒ ഗംഗാധരൻ അധ്യക്ഷനായി. സിഐസിടി ആൻഡ് സിസിആർഐ ഡയറക്ടർ ഡോ. ഒ എൽ ഷൺമുഖ സുന്ദരം മുഖ്യപ്രഭാഷണം നടത്തി. ഡോ. എസ് രാധാകൃഷ്ണൻ, എം കുമാരസ്വാമി പിള്ള, ഡോ. അഭേഷ് രഘുവരൻ, സുമി സെബാസ്റ്റ്യൻ, ഡോ. വിവേക് പ്രസാദ് ഷോ, ഡോ. എച്ച് പി സുമംഗല എന്നിവർ സെമിനാറുകൾ നയിച്ചു. കയർ ബോർഡ് കലവൂർ റീജിയണൽ ഓഫീസർ ഇൻ ചാർജ് കെ ശിവൻ, കയർ ഫെഡ് ചെയർമാൻ ടി കെ ദേവകുമാർ, കയർ കോർപ്പറേഷൻ ആൻഡ് ഫോം മാറ്റിങ്സ് ഇന്ത്യ ലിമിറ്റഡ് ചെയർമാൻ ജി വേണുഗോപാൽ, എഫ്ഐസിഇഎ ചെയർമാൻ റോബി ഫ്രാൻസിസ്, കലവൂർ റീജിയണൽ ഓഫീസർ പി എൻ സാബു, വിവിധ സംഘടന ഭാരവാഹികൾ, ഉദ്യോഗസ്ഥർ തുടങ്ങിയവർ പങ്കെടുത്തു.
(പിആർ/എഎൽപി/741)