ഒറ്റക്കെട്ടായ പ്രവർത്തനത്തിന്റെ വിജയം: ജില്ലാ കലക്ടർ

മാലിന്യമുക്തം നവകേരളം ജനകീയ ക്യാമ്പയിനിൽ സംസ്ഥാനത്ത് ഏറ്റവും മികച്ച പ്രവർത്തനം കാഴ്ചവച്ച ജില്ലയായി കണ്ണൂർ തെരഞ്ഞെടുക്കപ്പെട്ടത് ഒറ്റക്കെട്ടായ പ്രവർത്തനത്തിന്റെ വിജയമാണെന്ന് ജില്ലാ കലക്ടർ അരുൺ കെ വിജയൻ പറഞ്ഞു. ശുചിത്വ മാലിന്യ സംസ്‌കരണ രംഗത്ത് ജില്ലയിലെ 18 ഗ്രാമപഞ്ചായത്തുകൾ ഡിപിആർ തയ്യാറാക്കി വിപുലമായ പ്രവർത്തനങ്ങൾ ഏറ്റെടുത്തതിൽ തുടങ്ങിയതാണ് ഈ നേട്ടം. വലിച്ചെറിയൽ മുക്ത ജില്ലയുടെ പ്രവർത്തനത്തിൽ മുഴുകി, മാലിന്യമുക്തം നവ കേരളം ക്യാമ്പയിൻ ഇരുകൈയോടെ സ്വീകരിച്ച് ജനകീയ ക്യാമ്പയിനായി മാറി. ശുചിത്വം ഒരു കീറാമുട്ടിയായി കാണാതെ ജില്ലാ ഭരണകൂടവും വിവിധ വകുപ്പുകളും മിഷനുകളും തദ്ദേശ സ്വയംഭരണ സ്ഥാപനങ്ങളും വിവിധ സംഘടകൾ, വ്യക്തികൾ,സ്ഥാപനങ്ങൾ എന്നിവരും ഒറ്റക്കെട്ടായി എണ്ണയിട്ട യന്ത്രം പോലെ പ്രവർത്തനങ്ങൾ ഏറ്റെടുക്കുന്ന കാഴ്ചയാണ് കണ്ണൂരിൽ കാണാനാവുന്നത്. 
മാലിന്യങ്ങൾ വലിച്ചെറിയുന്ന ശീലം ഉപേക്ഷിച്ച് ശാസ്ത്രീയമായ മാലിന്യ പരിപാലനം ഒരു ജീവിതചര്യയായി പൊതുസമൂഹത്തിൽ കണ്ണൂർ ജില്ലയെ പ്രാപ്തമാക്കുന്നതിന് ഒരു പരിധിവരെ സാധിച്ചിട്ടുണ്ട്. നിരന്തര ബോധവൽക്കരണ പ്രവർത്തനങ്ങൾ, പൊതുജന പങ്കാളിത്തത്തോടെയുള്ള ശുചീകരണ യജ്ഞങ്ങൾ, മാലിന്യ ശേഖരണത്തിനും സംസ്‌കരണത്തിനുമായുള്ള കുറ്റമറ്റ സംവിധാനങ്ങൾ ഒരുക്കൽ, എൻഫോഴ്‌സ്‌മെന്റ് സ്‌ക്വാഡ് പ്രവർത്തനങ്ങൾ, ഹരിത നിയമപാഠശാലകൾ തുടങ്ങി സർവ്വതല സ്പർശിയായാണ് ക്യാമ്പയിനുകൾ ജില്ലയിൽ മുന്നോട്ടു പോകുന്നത്. മാലിന്യ സംസ്‌കരണവുമായി ബന്ധപ്പെട്ട് ഇനിയും ഒരുപാട് മികവാർന്ന പ്രവർത്തനങ്ങൾ വർദ്ധിത വീര്യത്തോടെ ഏറ്റെടുക്കേണ്ടതുണ്ടെന്ന് കലക്ടർ പറഞ്ഞു.
കണ്ണൂരിനെ ഹരിത ശുചിത്വ മാതൃകാ ജില്ലയായി വളർത്തിയെടുക്കുന്നതിന് അക്ഷീണം പ്രയത്‌നിച്ച മുഴുവൻ തദ്ദേശസ്വയംഭരണ സ്ഥാപനങ്ങൾക്കും മിഷനുകൾക്കും വകുപ്പുകൾക്കും വ്യക്തികൾക്കും സ്ഥാപനങ്ങൾക്കും കലക്ടർ നന്ദി അറിയിച്ചു.